Viaxe a Bretaña. Primeiro día.

O luns 27 de maio, ben cediño, saímos en coche de liña dende o IES de Rodeira cara o aeroporto Sá Carneiro de Porto, en Portugal. Moitos nervos despois de todo un ano traballando e agardando para facer esta viaxe. 

Sen retrasos e sen atrancos, montamos no avión que nos había de levar a terras bretoas. Para algúns dos nosos aventureiros viaxeiros era a primeira vez que montaban nun aparello destes, así que os nervos continuaron. 

Despois dunha hora e media de vó, albiscamos dende a xanela as terras bretoas. Xustiño pola praia de Tronoën, onde está un dos "Calvaires" máis antigos de Bretaña, e a punta de Penmarc'h. Nesas dunas foron fusilados polos nazis, en 1944, 35 resistentes bretóns, entre os que había republicanos españois exilados en Francia. 

Ao pouco tomamos terra no aeroporto de Brest-Guipavas. Despois de recuperar as malas, tivemos que apañar unha navette e mais un autobús para chegar ao tranvía que nos había de levar ata o Collège, na outra punta da cidade. 

E por fin chegamos ao Collège Les Quatre Moulins- Ar Milinou, onde nos agardaba a nosa profesora mentora, Mme. Cécilia Delanney, cos alumnos franceses correspondentes. Agora tocaba descansar, que mañán comezamos a explorar este país.